Сведения о праздновании трем святителям: Димитрию, митрополиту Ростовскому, Митрофану и Тихону, епископам Воронежским

Тропарь, глас 8

Якоже древле на востоцех трие велиции святителие, сильный словом Василий, глубины богословия Григорий и Златоустый Иоанн, тако и днесь стране полунощней три новоявленная светила веры на тверди церковной востекоша: столп веры Митрофан, слово истины в лице царю исповедавый, и обличитель раскола Димитрий, мечем обоюду острым вся козни его разсекий, и помазания полный сосуд Тихон, тихостию словес своих грешника к покаянию призвавый. О велиции трие святителие земли Российския, молите Христа Бога, Емуже угодни бысте, спастися душам нашим.

Кондак, глас 3

Иже в поздния наша роды и в последняя времена обуреваемых треволнением житейских страстей и хладом безверия недугующим в скорби душевней утешившим и теплотою вашея веры согревавшии, трие новоявленнии святителие Российстии, Димитрие, Митрофане и Тихоне, на камени Православия утвердите ны и, яко чадолюбивии отцы, духовная чада ваша стезею заповедей отеческих в Царствие Христово вслед себе руководите.

Молитва общая святителем Христовым Митрофану и Тихону, Воронежским чудотворцам

О велиции угодницы Божии, крепции наши заступницы и молитвенницы, всехвальнии святителие Христови и чудотворцы Митрофане и Тихоне. Услышите нас, к вам припадающих и с верою вас призывающих. Поминайте нас у Престола Вседержителя и молитеся о нас непрестанно ко Христу, Богу нашему, дадеся бо вам благодать молитися за ны. Умолите предстательством вашим Всемилостиваго Бога нашего, да подаст Он Церкви Святей мир, пастырем ея — силу и ревность подвизатися о спасении людей и всем нам — дар, коемуждо потребен: веру истинную, надежду твердую и любовь неоскудевающую, да сохранит нас от глада, губительства, труса, потопа, огня, меча, нашествия иноплеменных, междоусобныя брани, смертоносныя язвы, внезапныя смерти и от всякаго зла; юным и младенцем да дарует благое в вере возрастание, старым и немощным — утешение и подкрепление, болящим — исцеление, сиротам и вдовицам — милость и заступление, заблудшим — исправление, бедствующим — благовременную помощь. Не посрамите нас во уповании нашем, споспешествуйте, яко отцы чадолюбивии, и нам понести иго Христово во благодушии и терпении, и всех управите в мире и покаянии непостыдно скончати живот свой и Царствия Небеснаго сподобитися, идеже вы ныне водворяетеся со Ангелы и всеми святыми, прос­лавляюще Бога, в Троице славимаго, Отца, и Сына, и Святаго Духа. Аминь.